NASA-nın Bennu asteroidindən Yerə gətirdiyi nümunələrin yeni təhlili Günəş sisteminin yaranma mərhələləri ilə bağlı maraqlı nəticələr ortaya qoyub.
Lent.az xəbər verir ki, bu barədə “ScienceDaily” asteroid nümunələrinin araşdırılmasına dair elmi məlumatlara istinadən xəbər yayıb.
Tədqiqatın nəticələri Bennunun ilkin materiallarının Günəş sisteminin daxili və xarici hissələrindən gələn maddələrin qarışdığı mühitdə formalaşmış ola biləcəyini göstərir. Alimlər bu prosesdə Yupiterin cazibə təsirinin də mühüm rol oynamış ola biləcəyini irəli sürürlər.
Təxminən 4,5 milyard il əvvələ aid materiallar planetlərin formalaşdığı dövrün kimyəvi və fiziki şəraitini öyrənmək üçün mühüm əhəmiyyət daşıyır.
Bennu nümunələri NASA-nın “OSIRIS-REx” missiyası çərçivəsində əldə edilib. Onların laboratoriya şəraitində araşdırılması Günəş sisteminin ilkin tarixini daha dəqiq anlamağa imkan verir.
